Ekainberri kobazuloak 26.000 bisitari ditu, eta Lili jauregiak 2.000 bisitari baino gehiago
2023an, 28.262 pertsonak bisitatu dituzte Ekainberri eta Lili jauregia. Ekainberrira 26.090 joan dira, hau da, % 5 gehiago. Bisitari gehien izan dituen hilabetea apirila izan da, 3.411 bisitari guztira, eta gutxien izan duena, iraila, 1.211. Gizonen eta emakumeen artean, datuak oso antzekoak dira: bisitarien % 52,60 gizonak dira, eta % 47,40 emakumeak. Lili jauregian egiten den “Lililitarren ohorea” antzerki-bisitari dagokionez, 2.172 bisitari izan dira.
https://www.gipuzkoa.eus/eu/-/ekainberriko-bisitari-kopurua-5-hazi-da-2023an-2022arekin-alderatuta
Goizane Álvarez Kultura, Lankidetza, Gazteria eta Kiroletako diputatua pozik agertu da bi kultura-instalazio horien emaitza onengatik; izan ere, Munduko Ondarea den toki baten balioa ondo ulertzen dutenentzat “nahitaezko” bisita bihurtu dira. Hortik ondorioztatzen da, Ekaingo haitzuloa itxita dagoen arren, pinturak egoera ezin hobean daudela oraindik, eta horiek ezagutzeko jende asko joateak erakusten duela Ekainberriren erreplikak bere funtzioa bete duela. Gogobetetze-maila handia erakusten du bisita urtero errepikatzen duten ikastetxeek, eta hori Ekainberriren eskaintza didaktiko “zabal eta arrakastatsuaren” adibide bat da.
Álvarezen ustez, Ekain euskal kulturaren munduko adierazpen kultural gorena da, Gipuzkoan bisitagarri bakarra, Ekainberriren bitartez, eta “altxor bat da eta bisitatzea merezi du”. Esan duenez, ondare «garrantzitsu» baten aurrean, gipuzkoarrok Ekain eta Ekainberri kontserbatzeko eta babesteko erantzukizuna dugu, tresna «bakarra» baita, eta, gainera, inpaktu ekonomikoa izaten ari da lurraldean, bai eta Zestoan eta inguruko udalerrietan ere. Eta zeregin “funtsezko” horretan dago Gipuzkoako Foru Aldundiko Kultura Departamentua.
Era berean, adierazi duenez, jendeak jakin nahi du nondik datorren eta zergatik gauden hemen, eta, zalantzarik gabe, Ekainberrin, Ekainen dauden pinturak eta horma-irudiak ikusteaz gain, duela 14.000 urteko pertsonak nola margotzen zituzten ere jakin dezakegu, nola egiten zuten su eta nola ehizatzen zuten. Are gehiago, bisitariek tailerrean ikusitakoa eta ikasitakoa praktikara eraman dezakete horretarako eremuetan: pinturak dituen eremua, beren labar-artea sortzeko; historiaurreko teknikekin sua egiteko txoko bat; eta azagaiekin ehiza egiteko ibilbide bat, bultzagailuekin, ehizarako trebetasunak probatzeko. Jarduera hau urte osoan eskaintzen da, asteartetik igandera. Bisita leihatilan erreserbatu daiteke (Portale kalea 1, Zestoa – Tel.: 943868811), edo Interneten sarrera erosi daiteke: www.ekainberri.eus.
Gainera, Lili jauregian “Lilitarren ohorea” antzezlana ikus daiteke. Lili jauregiaren agertoki errealean garatzen da, pertsonaia historikoekin, aktore baten dramatizazioarekin. Bakarrizketa batean, Andre Madalenek, jauregian bizi izan zen azken pertsonak, 1678ra lekualdatzen du bisitaria, eta bidean etxeko geletan eta aretoetan barrena murgiltzen ditu. Antzerki-lan “esklusibo” bat, gehienez 20 ikuslerekin saio bakoitzeko.
Azkenik, Ekain Fundazioak eta Hezur Museoak erakusketa berri bat inauguratu zuten joan den abenduaren 16an Ekainberrin, “Ehizarako artea” izenburupean. Erakusketa 2024ko martxoaren 3ra arte egongo da ikusgai eta José Julián Márquezek egindako 19 bultzagailu erreplika erakutsiko dira; horiek dira armarik zaharrenak eta Historiaurrean erabiltzen zirenak. Gainera, erakusketa bat eskainiko da, gaztelaniaz. Silexen taila erakutsiko da, eta lantza edo azagaia bat muntatuko da eta historiaurreko propultsatzailea duen ehiza-erakustaldi bat egingo da. José Julián Márquezek berak gidatuko du erakustaldia. Parte hartzeko, aurrez izena eman behar da, plazak doakoak izan arren mugatuak baitira. 943 86 88 11 telefonoan edo info@ekainberri.com helbide elektronikoan egin daiteke erreserba.
